ئاراس 1386

شه هید

شه هید نه مره وه کوو شاخ

وه کوو به فر

وه کوو دره خت

وه کووبه هار وگوله باخ

شه هید ئاوه

تینوویه تی زه وی ده شکینی

په نجه وده سته

ئازاری خاک را ده ژینی

سومای چاوه

کام دوا روژ دووره ده یبینی

شه هید بالای به قه د بالای کوردستانه

دلی ئازادی وبه یداخی لووتکه ی هه لویستی ئینسانه

+ نوشته شده در سه شنبه شانزدهم اسفند ۱۳۹۰ ساعت 20:52 توسط ئاراس |

حووزه لاره

حووزه لاره

ئێشه‌و وه‌رمه‌نه‌ حۆۆزه‌لاره‌م دی

حۆۆزه‌لارێوی په‌ڕ په‌ژاره‌م دی

به‌ رێز و ئه‌هوه‌ند ته‌که‌م دا لاشۆۆ

ته‌که‌م دا لا کۆ به‌رزو داخاشۆۆ

په‌رسام: ئاد نیه‌نی جه‌ره‌یان چێشا؟

لێێوش چه‌رخنا و ئاهێوش کێشا

ماچۆ چێش واچو جه‌ چێشی واچو؟

جه‌ کام زام سه‌خت په‌ر ئێشی واچو؟

من په‌ی ئینه‌یه‌ وه‌ش نه‌کریانێ

په‌ی ئینه‌ی نه‌بێ و بنه‌ڕه‌ت نریانێ

که‌یێو دیوارو ئه‌من ساچێنێ

نۆۆسۆده‌ێ کۆگاو شادیش واچێنێ

نۆۆسوده‌ ئا وه‌خت شۆره‌و هه‌ردا بێ

هێلیان هه‌ڵۆ بێ و به‌رزو به‌رزا بێ

کۆگاو هۆنه‌ری و یانه‌و زۆۆقی بێ

یاگێ خه‌نده‌ی و شۆرو شۆۆقی بێ

ئۆسا کارێ من هه‌ر یۆ فه‌رهادێو

هه‌ریۆ شیرین کار شیرین جه‌ یادێو

ئۆسێێ کارامێ جه‌ پیر و جوان

ئێنێ دۆۆرمۆۆری به‌ دڵ و به‌ گیان

ته‌وه‌ن ته‌وه‌نم به‌ دڵ ئارێنێ

یاگێ که‌رێنێێ و وه‌ش ونارێنێ

سه‌رتاره‌ وارم به‌ دڵ نریاره‌

گۆشه‌ به‌ گۆشه‌م به‌ عه‌شق مجیاره‌

‌ سوره‌چنارێ دۆۆرمه‌نه‌ نریێێ

سه‌یێ و سه‌هه‌ندێم ته‌داره‌ک دریێێ

چه‌نی تۆف تاف شنه‌‌و شه‌تاوا

ته‌قه‌و چه‌قچه‌قه‌ی گرمه‌و ئاساوا

مه‌حشه‌ر بێ دۆۆرم رۆ تاوێره‌گا

من نگێن بێنێ و بازنه‌ بێ ده‌گا

چوار وه‌رزه‌و ساڵی ویارگه‌ بێنێ

تا چه‌م بر که‌رێ دیارگه‌ بێنێ

هامنانی وه‌ختێو گه‌رما زۆر ئارێ

مه‌ردم په‌نا په‌ی سه‌هه‌ندام ئارێ

سه‌ی و سه‌هه‌ندم گه‌رما لاده‌ر بێ

شنه‌و شه‌تاوم مانیا به‌ر که‌ر بێ

مه‌ردم پۆل پۆله‌ کۆگا گێرێنێ

جه‌ تیره‌و گه‌رمای په‌نا گێرێنێ

بڕێو هه‌رمانێ ڕوا ئارێنێ

چێگه‌ به‌ ئارام چه‌مشا دارێنێ

یۆ نه‌یجه‌ ئارێ و چنگڵه‌‌ گێرێوه‌

یوه‌یچ ئێ و لوێ به‌ له‌ته‌رێوه‌

یۆ ته‌خته‌ تاشێ و ترێشته‌ ده‌سۆۆ

یوه‌ کڵاش چنێ به‌ دیده‌ی مه‌سۆۆ

به‌رقو نیگایا و بروسکه‌و نازی

شریخه‌و ورکه‌و ئاواته‌ وازی

چه‌نی یاسه‌مه‌ن، عه‌ترو ڕێحانی

یاگێێم یاگێ بێ و یاگێ ژیانی

به‌ینا به‌ین به‌زمو نه‌قڵ و ڕازا بێ

تاو تاوه‌ ده‌نگو وه‌ش ئاوازا بێ

یۆ شێعرێ ئارێ و فه‌ردێ وانێوه‌

یوه‌یچ به‌ نازۆۆ په‌یش ئه‌سانێوه

دۆۆرانێوم بێ و شۆره‌م لوا بێ

ساو سه‌هه‌ندو من چێوێو جیا بێ

مه‌ردم جه‌ دورۆۆ ئێنێ سه‌یرانم

هه‌رکه‌س ئامێێ لام بێ به‌ حه‌یرانم

پاڵو وه‌شیانه‌ تشیێچم دیێ

کۆسپێ فرێ ئامێێ و به‌ختێ فرێم شیێ

عۆسمانی ئێێرش ئۆۆ جه‌سه‌م وه‌ردا

تاران جه‌ داریم قه‌ناره‌ش هۆردا

گرد دۆۆرێوه‌نه‌ جوان یاوی ده‌ممۆۆ

تیمارم که‌رێ و خجڵیێ خه‌ممۆۆ

ئیسه‌ به‌ داخۆۆ دۆۆرانێوته‌را

ئی تۆفه‌ تۆف و بۆرانێوته‌را

ئۆۆسا ناحه‌زێ هه‌ر تێخ شانێنێ

جه‌سێ پێکێنێ و ره‌جه‌ز وانێنێ‌

ئیسه‌ به‌ گرد جۆر مه‌یانه‌ مێدان

ده‌رون چون جه‌سه‌ که‌رانێ وێران

ئیسه‌ وه‌ش وه‌شێو ویرێ به‌راوه‌

ده‌رونێ پێکا و مه‌ژگێ شۆراوه‌‌

ئیسه‌ رێکلامێ چه‌مێ به‌رانێ

تۆزێ سیاسه‌تا یۆی کۆر که‌رانێ

ئازاش گه‌ره‌کا تاوۆ به‌ر به‌رۆ

راو وێش بێزۆوه‌ و سه‌ره‌ به‌ر که‌رۆ

ئی دۆخه‌ تا وێێچ کارو وێش که‌رده‌ن

مه‌ژگو بازێویش گێجه‌نێ به‌رده‌ن

کابرا سه‌یمه‌نه‌ پا سه‌رو پایۆۆ

چاکری لایده‌ی مدۆ سڕنایۆۆ

نه‌شه‌رمێو گێرۆش نه‌ مارۆ و به‌رۆ

سازه‌و نۆکه‌ری لایده‌ی کۆک که‌رۆ

پاسه‌ گۆچ کریان چون وێش مه‌شۆنه‌

مشیۆ وێ فاڕۆ تا په‌سه‌ند بۆنه‌

په‌ی سوکه‌ ده‌سێو ئۆۆ سه‌رو شانه‌ی

ئاماده‌ن وێش دۆ جیای ‌ ده‌سوه‌شانه‌ی

نه‌فام و نه‌زان کاڵ وکاڵ ئه‌ندێش

گه‌ره‌کشا منیچ چه‌منۆ وێنه‌ی وێش

به‌ ته‌مان به‌رۆم عه‌رش خه‌یاڵیش

که‌رۆم قؤربانه‌و ئیده‌ی پوشاڵیش

که‌یێو که‌ وینۆ من په‌یش مه‌چه‌مه‌یه‌و

خامی ره‌سته‌نا و به‌ واش مه‌نه‌میه‌و

چون زه‌رده‌واڵه‌ به‌ ده‌رزێو نێشۆۆ

سه‌راسێ گێرۆو منیشۆ وێشۆۆ

مدۆ وێشۆۆری و ده‌س که‌رۆ هه‌را

ده‌س که‌رۆ ماڕای که‌للـه‌ شه‌که‌را

به‌ قار دۆ دۆشاو ئامێته‌ که‌رۆ‌

ده‌س په‌ی گرد چێوی ناجۆری به‌رۆ

مدیۆنه‌و ماچۆ: شه‌ڵلای نه‌بیێێنی

چون قه‌ڵاو سانی ڕیشه‌ کێشیێنی

تۆ ڕاو کاریه‌ریت وه‌نه‌ به‌سه‌نا

ئینای کۆڵێمۆۆ چه‌نه‌ت خه‌سه‌نا

چێش که‌رو چه‌نی خامی خام ئه‌ندێش

وێش هۆر کێشۆنه‌ به‌ نۆکه‌ری وێش

به‌رزی و گۆۆره‌یی وێش پاسه‌ وینو

که‌ ئاغاش چه‌نی وچونش په‌سینۆ

ماچی مرۆره‌و لێ قه‌نده‌هاری

کامش که‌رده‌نا به‌ ژارو ماری

من هه‌رچی که‌رو ئاد ناحاڵیشا

ملش نیان و مه‌یلو تاڵیشا

رۆۆتو ژه‌ره‌ژێش نیان ئۆۆ لاوه‌‌

سه‌رمه‌شقش بیه‌ن قاڵاوه‌ سیاوه‌

زوۆۆن یانه‌و من سه‌ربه‌شو یانان

جوانم ئاواره‌ و وێڵو کۆڵانان

زوۆۆن که‌رده‌و من به‌رده‌و جه‌رده‌یا

گفتو که‌سو من گفتو مه‌رده‌یا

ده‌سو وێم نیا که‌ڵپۆس پۆشه‌نا

فه‌ره‌جی دڕیا و به‌ په‌رۆشه‌نا

ناحه‌ز نمازۆ زامم سارێش بۆ

په‌یجۆرا هه‌رده‌م جه‌سه‌م په‌رێش بۆ

گێڵۆ و مێزۆوه‌ یاگێ خه‌ته‌رێ

خه‌نجه‌ره‌ مدۆوه‌ یاگێ خه‌نجه‌رێ

کینه‌ی کۆنه‌و نۆم په‌نه‌ مرمانۆ

لمو ده‌له‌سا ئۆۆ چه‌ما شانۆ

نمازۆ زامێم ساڕێشی وینا

ده‌مێو باراوه‌ په‌ترۆکێو بینا

که‌چی خام ئجؤش هه‌ر وێم زه‌ده‌نا

سرشتو وێما و هه‌ر وێم به‌ده‌نا

گاهه‌ن سه‌رکه‌رۆ و گنۆنه‌ دامی

بۆ به‌ ڕانماو شانه‌رو زامی

بێ ئاگا جه‌ گرد ویرو تارێخی

مدۆنه‌ وه‌ڵێ خاوه‌نو تێخی

به‌دی و به‌دبه‌ختیم هه‌ر لێێوۆۆ نیا

هه‌رلێێوۆۆ مدیه‌یو هه‌ر به‌دبه‌ختیا

ئاوه‌خته‌ به‌خته‌م ڕاو یانه‌یم زانێ

زۆۆق چه‌نیم ساچێ شۆۆق چه‌نیم وانی

به‌ لایه‌ لایه‌ سه‌ره‌ نیێنێێ

چه‌نی سه‌حه‌ریێ چه‌مێ که‌رێنێێ

به‌ سیاوچه‌مانه‌ باڵا که‌رێنی

به‌ کۆؤرپه‌لێ گیان گه‌ڵا به‌ر دێنێ

که‌چی ئێسه‌تێ ده‌نگێو پۆپه‌مۆۆ

گرد جارێو شۆۆقم تلنۆوه‌ ته‌مۆۆ

جار جار کامێرا مزنانه‌ دیارم

گێرانێ وێنه‌ی جه‌سه‌ی خه‌مبارم

چیلاو چۆۆلاوه‌ چێرو وێنه‌کام

چێر نویس که‌را و ماراشۆۆ ئۆۆلام

که‌یێو که‌ وینو نامێ فاڕیانا

به‌ زوانێوته‌ر نامێ نریانا

عاره‌قو شه‌رمی سه‌راپام پێکۆ

من کۆگه‌ی بێنێ و یاوانا ئۆۆکۆ

چێش که‌رو چه‌نی ده‌سێ ده‌س نه‌شیه‌یم

چه‌نی شانسی که‌ج لاری لار دیه‌یم

ده‌سم مه‌ده‌نه‌ و واز چه‌نه‌م باره‌

با هه‌ر داخدار بو چون حۆۆزه‌لاره‌

جوابووحووزه‌لاره‌ی

برام گرد خه‌تای چه‌رخی گه‌ردوونه‌ن
چیرده‌سی فه‌زل و پیایی زه‌بوونه‌ن
زه‌وق و سه‌لیقه‌ و فام و ئه‌ندیشه
تیک وپیک دریان جه ره گ وریشه
کابرای بی‌هونه‌ر بی فه‌زل و بی سوود
بیه‌ن به سانی شاره‌که‌ی نه‌وسوود
ئامان و بیه‌ن کویخاو ده‌گایمان
که‌ره‌شیلی کوشان نه‌بووه هایمان
ئاد به لی که‌ره‌ن هه‌ر ئه‌ری واچه‌ن
جه‌وی نابووده‌ن فره ده‌سه‌پاچه‌ن
ئانه دلسوزو ولاتو ویشه ن
ژیوایش سه‌خله‌ته‌ن ژیانش کیشه‌ن
دورشان وسته‌نو جه نیشتیمانیش
دله‌خورپه‌شه‌ن په‌ی ویش و گیانیش
په وکه‌ی دلگیره‌ن میدان و حووزت
سوچیان،وشکه‌ن چیای سه‌رسه‌وزت
هه‌ریاگه‌ی ملی هه‌ر داگیرکه‌ره‌ن
ڕۆجیار تاسیان دونیا سیبه‌ره‌ن